Árshlutareikningur Eikar fasteignafélags hf. fyrir tímabilið 1. janúar til 30. júní 2024 var samþykktur af stjórn og forstjóra félagsins þann 15. ágúst 2024.
Helstu niðurstöður árshlutareikningsins eru:
- Rekstrartekjur námu 5.527 m.kr.
- Þar af námu leigutekjur 4.809 m.kr.
- EBITDA nam 3.519 m.kr.
- Heildarhagnaður nam 2.798 m.kr.
- Handbært fé frá rekstri nam 1.762 m.kr.
- Bókfært virði fjárfestingareigna nam 138.297 m.kr.
- Bókfært virði eigna til eigin nota nam 5.931 m.kr.
- Matsbreyting fjárfestingareigna var 4.084 m.kr.
- Handbært fé nam 782 m.kr.
- Vaxtaberandi skuldir námu 81.027 m.kr.
- Eiginfjárhlutfall nam 33,4%.
- Hagnaður á hlut var 0,82 kr.
- Virðisútleiguhlutfall var 93,6%.
- Vegnir verðtryggðir vextir fjármögnunar námu 3,39%.
- Vegnir óverðtryggðir vextir fjármögnunar námu 6,6%.
Meðfylgjandi er árshlutaskýrsla sem inniheldur árshlutareikning vegna fyrstu sex mánaða ársins 2024 ásamt ítarlegri upplýsingum um rekstur félagsins en fram koma í tilkynningunni.
Rekstur félagsins
Þrátt fyrir að rekstrarhagnaður félagsins sé lítillega undir áætlun, sem fyrst og fremst er tilkomið vegna lakari nýtingar Hótels 1919 og tilfallandi virðisrýrnunar viðskiptakrafna, gengur útleigan betur en áætlað var sem og uppbygging eigna í þróun. Rekstrartekjur félagsins á fyrstu sex mánuðum ársins 2024 námu 5.527 m.kr. Þar af voru leigutekjur 4.809 m.kr. Rekstrarkostnaður nam 1.958 m.kr. og virðisrýrnun viðskiptakrafna 50 m.kr.
Rekstrarhagnaður fyrir matsbreytingu og afskriftir nam 3.519 samanborið við 3.827 á sama tímabili árið áður. Hagnaður fyrir tekjuskatt nam 3.497 m.kr. og heildarhagnaður samstæðunnar á fyrstu sex mánuðum ársins 2024 nam 2.798 m.kr.
NOI hlutfall (þ.e. rekstrarhagnaður fyrir matsbreytingu og afskriftir sem hlutfall af leigutekjum) nam 69,9% á fyrstu sex mánuðum ársins 2024 samanborið við 78,4% fyrir sama tímabil 2023. NOI hlutfall á fyrri helmingi ársins 2023 var óvenju hátt m.a. vegna einskiptisliða er sneru að jákvæðri virðisrýrnun viðskiptakrafna. Leiðrétt fyrir þeirri færslu var NOI hlutfall á fyrri helmingi ársins 2023 74,4%.
Fjárfestingareignir félagsins eru metnar á gangvirði í samræmi við alþjóðlega reikningsskilastaðla (IFRS) og stuðst er m.a. við núvirt framtíðarsjóðstreymi einstakra eigna. Breytingar á gangvirði eru færðar undir matsbreytingu fjárfestingareigna sem var um 4.084 m.kr. á fyrstu sex mánuðum ársins. Stærstu liðirnir til hækkunar á virði fjárfestingareigna eru verðbólga, nýir samningar og lægri ávöxtunarkrafa á arðsemi eigin fjár. Stærstu liðir til lækkunar er hækkun á fjármagnskjörum og hækkun á fasteignamati.
Efnahagur félagsins
Heildareignir félagsins námu 147.753 m.kr. þann 30. júní 2024. Þar af eru fjárfestingareignir að virði 138.297 m.kr. sem skiptast í fjárfestingareignir í útleigu að fjárhæð 127.440 m.kr., fjárfestingareignir í þróun 4.543 m.kr., byggingarheimildir og lóðir 3.666 m.kr., fyrirframgreidd gatnagerðargjöld 13 m.kr og leigueignir að fjárhæð 2.636 m.kr. Eignir til eigin nota námu 5.931 m.kr. og fasteignir í þróun 1.089 m.kr. Eigið fé félagsins nam 49.281 m.kr. í lok tímabilsins og var eiginfjárhlutfall 33,4%. Á aðalfundi félagsins þann 11. apríl 2024 var samþykkt að greiða út arð til hluthafa vegna rekstrarársins 2023 að fjárhæð 2.540 m.kr. og var hann greiddur þann 30. apríl 2024 til hluthafa.
Heildarskuldir félagsins námu 98.472 m.kr. þann 30. júní 2024. Þar af voru vaxtaberandi skuldir 81.027 m.kr. og tekjuskattsskuldbinding 13.203 m.kr. Veðhlutfall félagsins, þ.e. nettó staða vaxtaberandi skulda á móti virði fasteigna, byggingarheimilda og lóða var 56,4%. Á fyrstu sex mánuðum ársins endurfjármagnaði félagið um 8.800 m.kr. af óverðtryggðum lánum á breytilegum vöxtum og tók í staðinn verðtryggð lán á breytilegum vöxtum. Félagið tók einnig tvö ný verðtryggð bankalán á breytilegum vöxtum að fjárhæð samtals 1.350 m.kr. til 18 mánaða. Þá gaf félagið út skuldabréf að fjárhæð 1.300 m.kr. á 3,75% föstum verðtryggðum vöxtum með lokagjalddaga 2049, en uppgreiðsluheimild eftir fjögur ár.
Í byrjun júlí 2024 gaf félagið út nýjan skuldabréfaflokk EIK 050734, að fjárhæð 5.000 m.kr. á 3,95% verðtryggðum vöxtum. Samhliða því voru veltilán félagsins greidd niður og verður hluti útgáfunnar nýttur í að greiða upp EIK 24 1 sem er á lokagjalddaga í september næstkomandi og er 3.000 m.kr. að stærð. Þar með hefur félagið lokið endurfjármögnun á þeim skuldum sem voru með lokagjalddaga á árinu.
Eignasafn félagsins
Félagið keypti leikskóla í byggingu við Réttarheiði 45 í Hveragerði og er áætlað að hann verði tekinn í notkun seinnihluta ársins. Byggingin er viðbygging við núverandi leikskóla í Hveragerði og samið hefur verið við Hveragerðisbæ til langs tíma um leigu á leikskólanum.
Félagið fékk til baka úr leigu í lok júní, Rauðarárstíg 27, þar sem Utanríkisráðuneytið var til húsa og hefur eignin í framhaldi verið sett í sölu.
Virðisútleiguhlutfall
Virðisútleiguhlutfall félagsins var 93,6% við lok tímabilsins og lækkar um 0,7% frá áramótum.
Í upphafi árs gerði félagið ráð fyrir að virðisútleiguhlutfall í lok annars ársfjórðungs yrði 92,5% og því hefur útleiga gengið betur en gert var ráð fyrir. Þar að auki hefur félagið leigt út rúmlega þriðjung af þeim þróunarfermetrum sem félagið áætlar að verði orðnir tekjuberandi í lok árs 2025. Þar sem þessir fermetrar voru flokkaðir sem þróunarfermetrar hafa þeir lítil áhrif á virðisútleiguhlutfallið.
Horfur
Félagið hefur uppfært horfur fyrir árið 2024 og væntir þess að EBITDA ársins verði á bilinu 7.280 – 7.580 m.kr. á föstu verðlagi út árið miðað við vísitölu neysluverðs til verðtryggingar í september 2024.
Uppfærðar horfur taka m.a. mið af væntingum Radisson Hotel Group um lægri afkomu Hótels 1919 en vonir stóðu til í upphafi árs.
Þrátt fyrir að handbært fé frá rekstri sé nokkuð lægra en fyrir sama tímabil í fyrra þá áætlar félagið að handbært fé frá rekstri fyrir árið 2024 verði hærri en árið 2023.
Frelsi til athafna
Stjórn Regins hf. (nú Heimar hf.) tilkynnti þann 29. apríl sl. um afturköllun á samrunatilkynningu þess til Samkeppniseftirlitsins vegna valfrjáls yfirtökutilboðs til hluthafa Eikar sem lagt var fram þann 6. júlí 2023. Jafnframt samþykkti fjármálaeftirlit Seðlabanka Íslands afturköllun á tilboðinu þann 10. maí 2024. Félagið hefur við afturköllun tilboðsins frelsi til athafna og skoðar nú tækifæri í eignasafni sínu, frekari útfærslur á fjármagnsskipan þess og möguleika á fjölgun tekjustofna.
Rafrænn kynningarfundur Rafrænn kynningarfundur verður haldinn föstudaginn 16. ágúst 2024 klukkan 8:30. Garðar Hannes Friðjónsson, forstjóri og Lýður H. Gunnarsson, framkvæmdastjóri fjármálasviðs, munu kynna uppgjörið og svara spurningum að lokinni kynningu.
Skráning á fundinn fer fram hér:
https://vimeo.com/event/4505368/cf0b257ea0
Eftir skráningu fá þátttakendur tölvupóst með nánari upplýsingum.
Markaðsaðilar geta sent spurningar fyrir eða á fundinum á netfangið fjarfestatengsl@eik.is. Stjórnendur hvetja markaðsaðila að senda inn spurningar fyrir fundinn til að hægt sé að undirbúa svör, sé þess þörf. Spurningum verður svarað að kynningu lokinni.
Fjárhagsdagatal
Stefnt er að birtingu árshluta- og ársuppgjöra á neðangreindum dagsetningum:
Árshlutauppgjör 3. ársfjórðungs 31. október 2024 Ársuppgjör 2024 13. febrúar 2025
Birting fjárhagsupplýsinga mun eiga sér stað eftir lokun markaða.
Nánari upplýsingar veita:
Garðar Hannes Friðjónsson, forstjóri, gardar@eik.is , s. 590-2200 Lýður H. Gunnarsson, framkvæmdastjóri fjármálasviðs, lydur@eik.is , s. 820-8980
Viðhengi
